aMas 18:5
bLen 30:13
cLen 30:13
dLen 30:14
eAis 28:16
fJol 2:32
gAis 52:7
hAis 53:1
jLen 32:21
kAis 65:1
lAis 65:2
Romans 10
1Luvutnetak mi luvurinuk. Lodoxoma rinotno ro xeneng at laxat tarak do limixin tinotno rak dinaba roo suu. La a ngising amisik ne Moroa rinedi. 2Nenia a epovo xusu ana tong i do nedi di lolos kusu ri lok lugugu ri ne Moroa. Ketla mo lavavara atnedi ri ne Moroa, kopmen na ru rinotno at lakleklen tuturun. 3Nedi di goxoklen langas ti lomokmokso ne Moroa ga lox i rik lox asepmus di basinge laxakapmek, ketla diga puse ngas axa at levendoxoma atnedi; kuren la di goxo raba axa di ri ne Moroa la langas ne Moroa ga lox i rik lox akmokso limixin. 4La ne Karisito gara lox epovo vam Lenavolo, kusu nege i nuunu, neni laradi mokmokso.Langas Ti Linintoo At Limixin Axap
5Moses ga malagan levelinga mumu langas ti lomokmokso mi lorongtonga res at Lenavolo, ni ga lok keretna,“Nege do i mumu asu levempanga Lenavolo i tong i, neni naba lox epovo axav i ri roo suu ren.” a
6Ketla ana levelinga i paase mumu langas ti lomokmokso saparap ne Moroa mi lunuunu;
“Nemen gat uguta doma raba u mi lususue do, nege naba urut uto vana at laxalibet?” (kusu ri lok ka ne Karisito ude xopok.) b
7La i paase bok keretna,
“Nemen gat uguta lok bok do, nege naba si uto xopok at lemenemen at labarongan?” (kusu ri lox asu ne Karisito basinge limixin diga met pam.) c
8Ketla Lovoang Kaala i lok keretna;
“Levelinga at ne Moroa mo ik lok saparap nimi, nom ik lok at levenbulubun atnimi la no xeneng bok at levempeve atnimi.” d
Neni na, levelinga at lunuunu nema ma vavang min. 9Do mina vaase asu mi levenbulubun atnimi do ne Iesu ni Leeme Silok, la mina nuunu mi lebelen nimi axap do ne Moroa ga lox aroo amlong ne Iesu at lanmet, nemi minaba roo suu. 10Kuren la nemi do mina nuunu mi lebelen nimi axap, nemi minaba sepmus; la do mina vaase asu i mi levenbulubun atnimi, minaba roo suu. 11Lovoang Kaala i vaase i xeretna,
“Do nege do i nuunu ren, neni noxo doma saasaa.” e
12Ana levelinga i vung kimit limixin axap, atla kopmen tevereven petpes kantubu at limixin me Judaia la limixin kopmen di me Judaia; Moroa xusuk mun legese Eme Silok atnedik axap, la ik lox anarong aleng nedi di ngising ti loklok tooro boro ren. 13I ngan levelinga at Lovoang Kaala i vaase xeretna,
“Limixin axap di toro ke at laasen at Leeme Silok, dinaba roo suu.” f
14Ketla dinaba sing kereva do nedi xovisi dina nuunu? La dinaba nuunu xereva do nedi xovisi dina ronga xaka levelinga? La dinaba ronga ka tavanga salai do kovisi tara na vaase asu tevelinga ridi? 15La tevelinga naba ravasu xereva mo do dixo riki asu taradi ri vavang min? I ngan Lovoang Kaala i tong i xeretna,
“I lox avukat tinotno lavatpas atnedi di vot mi Lagale Lavavang.” g
16Ketla limixin axap di goxo siam kaka Lagale Lavavang. I ngan bok ne Aisaia ga lok keretna,
“Leeme Silok. Goxo buaang nedi diga nuunu at levelinga maga vaase asu i.” h
17Kuren la lunuunu it pot do laradi ing tonga levelinga, la levelinga i laala boro at Lagale Lavavang at ne Karisito. 18Ketla a sue xeretna, i ruturun do di goxo ronga levelinga? Laaba, diga ronga i, i ngan pam Lovoang Kaala i vaase i xeretna;
“Levempapaase atdi ga ravasu ri limixin at lavatbung menemen axap. La levelinga ga vot tinotno ro at latnese at na lavatkangka.” i
19Ana sue bok lususue xeretna; kereva, limixin me Israel di goxo xasep ap mo levelinga? Laaba, diga xasep teren. La ne Moroa ga lok tong i do na sar amlong di. Moses neni lara avot ga tong mo lodoxoma at ne Moroa xeretna,
“Anaba lok nemi xusu minaba reven peves at limixin kopmen dina ruuna toxot keneng at losoksoxolik at ne Moroa; la anaba lok bok nemi xusu mina belemamao mumu lara lubungmixin kopmen dinaklen ne Moroa.” j
20La ne Aisaia ga vaase axasep tinotno xeretna,
“Lara lubungmixin di goxo puse ria ketla diga vuse ka ia, la nia aga vot saparap nedi di goxo susue vupuse ria.” k
21Ketla ti limixin me Israel, Moroa ga vaase xeretna,
“At levenaleng axap agara gagas pam kusu ri siam kaka amlong nedi luvuttadi rongtonga xepe la luvuttadi gagang linga.” l
Copyright information for
MMX